الشاعر .. أحمد طلبه
مرحب شهر الصوم
"
ويااه معناها من إحساس
وانا بستني رمضان
ونتلاقي في وسط الناس
وبنرجع ليالي زمان
ودي أيام وبتمر
وفرحه من ليالي العمر
ودلوقتي انا مَش حر
بقيت في الغربه دي تعبان
==========
في شهر الخير أنا فاكر
أبويا كان مجمعنا
في وسط البيت
دا انا حنيت
للمه عيله عالمغرب
لا شوفت زيها ابدا
ولا بعديها انا حسيت
ودي أيام لكن راحت ٠٠٠ ولكن بالحنين فاحت
في أول ليله في رمضان
خدني حنيني أنا غنيت
وانا محروم
مرحب شهر الصوم
============
أنا في الغربه زي جماد
وإنسان بس من غير روح
ماهو وجع الحنين لو ذاد
هيبقي العمر كله جروح
أنا بكره أكيد صايم ٠٠٠ وقلبي موحد الدايم
وهصبر اصل انا فاهم٠٠ مسيري لأهلي بكره هروح
وتفضل روحي بتغني
بصوت مكتوم
مرحب شهر الصوم
===========
وأه عليك يا رمضان
بتاخدني بروحي زمان
وتولد فيا أوجاعي
وانا بحاول النسيان
بحاول انسا فيك الروح ٠٠٠ عشان في الغربه انا مجروح
وعايش اه حلاوه روح ٠٠٠ وبفطر فيك لوحدي كمان
فبلاش تقلب مواجع
خليني ساكت وسامع
غناوي وصوت المدافع
بتوجع فيا يوم عن يوم
ومرحب شهر الصوم
أحمد طلبه
٢٠١٧/٥/٢٣
تعليقات
إرسال تعليق